Month: July 2016

Avontuur

Wat gaan deur jou gedagtes as ek die woord avontuur noem? Wat is jou siening van ’n avontuur? Is jy ’n avontuurlustige persoon of verkies jy dalk die ligeter dingetjies in die lewe…

Elke mens het maar ’n ander siening oor wat avontuur is. Vir party van ons is net ’n rustige stappie tussen die berge alreeds ’n groot avontuur. Vir ander moet daar bietjie iets waaghalsig aan betrokke wees om dit ’n avontuur te noem. Net so is die lewe ook eintlik een groot avontuur waarop ons is. Ons is almal op ons eie manier van ’n avontuur en so bepaal ons siening van avontuur ook hoe jy jou lewe leef. As jou siening van avontuur rustig is, is dit heel waarskynlik dat jy ’n rustige lewe sal handhaaf. As jy so nou en dan iets waaghalsig sal aanpak, is dit ook moontlik dat jy in die lewe so nou en dan ’n waagkans sal vat. As jy totaal en al vir aksie en adrenalin leef, het jy moontlik ook ’n baie besige en aksie volle lewe. So ook is dit belangrik om mekaar en ander se manier van lewe te probeer verstaan. Ons almal kan nie dieselfde wees nie en ons almal kan nie kanse waag nie. Ons het tog die versigtige mense ook nodig in die lewe en dan vir ander gebiede is die kansvatters weer voor om rigting te gee. Die groot geheim is om jouself dalk te verstaan en te bepaal watse tipe mens jy is. Dan kan jy self besluit op watter pas om aan te gaan en so ook die regte avontuur vir jou te kies. Iemand wat nou glad nie van die natuur hou nie en eerder binnehuis sal wil wees gaan tog dan nie elke naweek op ’n staptoer of bergklim ekspedisie nie. Hoekom dan as jy ’n rustige persoon is en stilte verkies sal jy dan uitgaan en partytjies hou tot laat aan waar lawaai en goed is waarvan jy niks hou nie? En nou net soos jy jouself dan kan verstaan, moet jy ook leer om ander om jou te begin verstaan. Weereens moet ek sê ons is nie almal dieselfde nie so ons gaan almal ander dinge hê waarin ons belangstel en wil tyd aan spandeer. Dit mag ook nou heel moontlik klink of ek nou net op ’n avontuur van skryf is en nie ’n punt het nie, maar eintlik is die kort skryfstuk van my vinnig tot op die punt wat ek probeer maak.

Dit wat jy in jou gedagtes en in jou lewe as avontuur beskou, is nie noodwendig vir ’n ander persoon ’n avontuur nie. Respekteer ander en leer om te verdra, te probeer verstaan en so kan die wêreld weereens ’n stappie nader kom aan ’n beter plek wees, vir ons almal.

 

Advertisements

Jou plekkie in die son

“Almal wil graag ’n plekkie in die son hê.” Ek het hierdie woorde al so baie gehoor en soms dink ek mens begryp nie werklik hoeveel dryfkrag net agter die stelling sit nie. Hierdie visie is iets wat elke mens op aarde laat voortgaan in ’n rigting om te doen wat hy of sy graag wil doen. Dit is ’n stelling wat so mooi verduidelik hoekom ons as mens alewig besig is om na beter te soek en graag sal wil beter doen in die lewe.

Elke mens het seker dan ook sy eie idee van sy plekkie in die son. Vir een persoon is dit ’n mooi huis wat hy of sy as sy eie kan maak en vir ander is dit ’n sekere pos by die werk. Dan is daar ook die wat glad nie oor besitting omgee nie, maar eerder hulle self deel van ’n sekere groep mense sal wil sien. Maak nie saak waar ook al jy jou plekkie in die son sien nie, almal het of droom van hulle eie. Nou kom daarby nog ook ’n ander groot probleem. Wat van as iemand anders in jou plek staan waar jy graag wil wees. Dit is nou waar die menslike natuur inskop en die stelling verander om te sê, “gun iemand anders ook ’n plekkie in die son.” Hoeveel mense sal ’n ander vertrap, verneuk of verdryf net omdat hulle nie wil hê daardie persoon moet gelukkig wees nie? Baie mense is self nie gelukkig nie en het nog nie hulle plekkie in die son gevind nie en sal dan alles moontlik doen om ’n ander persoon wat alreeds in die son staan te verdryf om in sy spasie te staan. Is dit dan nie ook so dat as jy nie gelukkig is met jou werk dat jy die mense om jou ook nie gelukkig wil sien nie. As jy nie ’n gelukkige lewe het nie dan wil jy ander om jou ook ongelukkig maak. Daar is soveel mense wat nie geluk kan vind nie omrede hulle so besig is om ander ongelukkig te maak, dat hulle nie tyd het om hulself gelukkig te maak of om geluk te gaan soek nie. Ek weet dit is in ons menslike natuur om so te wees, maar ek dink soms moet jy as persoon net bietjie gaan sit en kyk hoekom jy werklik nie gelukkig is nie. Soms moet jy net bietjie van negatiewe denke laat gaan en nie jou eie situasie gebruik om ander om te krap nie. Dit is so moeilik om in ’n persoon se geselskap te wees of saam so ’n persoon te werk wat net die heeldag lank kla en probeer negatief wees oor alles. Soms in so mate negatief dat die persoon die omstandighede vir almal ondraaglik maak. Ook soms laat so persoon se houding ander negatief benadeel. Ek dink soms moet ons net bietjie na onsself gaan kyk deur ’n ander persoon se oë. Gaan kyk en dink bietjie hoe sien ander jou. Moet nie net aan jou self dink nie en neem ander om jou in ag.

Almal wil graag ’n plekkie in die son hê, maar moet nie mense uit die son uit skuif om hulle plekkie te wil vat nie. Wie weet wat gebeur as jy iemand skuif en die son verander posisie deur die dag. Dalk eindig jy later in ’n skadu van ’n groot boom of gebou en dan kry die persoon wat jy weggeskuif het weer son en jy is vasgekeer waar jy eintlik nou lekker in die son sou kon staan as jy net bietjie geduldig was…